Усе рубрыкі

Самуіл Маршак — Багаж (2 пераклада на беларускую)

Дама здала ў багаж
Канапу,
Дыван,
Сакваяж,
Валізу,
Карціну,
Кардонку
І дробнага цюцьку-балонку.

Маршак на беларускай мове

Выдалі даме на станцыі
Аж цэлых чатыры квітанцыі,
Што быў атрыманы багаж:
Канапа,
Дыван,
Сакваяж,
Валіза,
Карціна,
Кардонка
І дробны сабачка балонка.

Рэчы вязуць на перон,
Кідаюць дакучы ў вагон.
Ура! Спакаваны багаж:
Канапа,
Дыван,
Сакваяж,
Валіза,
Карціна,
Кардонка
І дробны сабачка балонка.

Ды толькі пачулі званок –
Сабачка з вагону ўцёк.
Убачылі ў Беразіно,
Што страцілі месца адно.
У роспачы лічаць багаж.
Канапа,
Дыван,
Сакваяж,
Валіза,
Карціна,
Кардонка.
А дзе, выбачайце, балонка?

Аж бачаць, ля колаў прылёг
Чарнюткі адкормлены дог.
Схапілі яго – і ў багаж,
Туды, дзе ляжаў сакваяж,
Валіза,
Карціна,
Кардонка,
Дзе ехаў сабачка балонка.

І вось прыбылі ў Магілёў.
Насільшчык з вагону ізноў
На тачку згружае багаж:
Канапу,
Дыван,
Сакваяж,
Валізу,
Карціну,
Кардонку…
І цягнуць сабачку за шворку.

Сабака як басам брахне!
Кабета спужалася: – Не!
Махлярства! Крадзёж! Ашуканства!
Парода – не тая, спадарства!

Кабеце не трэба й багаж:
Сапхнула нагой сакваяж,
Валізу,
Карціну,
Кардонку
-Вяртайце , злачынцы, балонку!

- Прабачце! У Менску на станцыі
Мы ў вас прынялі па квітанцыі
Вось гэты дакладна багаж:
Канапа,
Дыван,
Сакваяж,
Валіза,
Карціна,
Кардонка
І дробны сабачка балонка.

Але, пэўна, з двух да шасці
Сабака ваш мог падрасці!

Пераклад Алены і Андрэя Церашковых

Пераказ дедау чамадан
Малюнкі: Настасся Чарнікава

***

Пані здавала ў багаж
Дыван,
Чамадан,
Сакваяж,
Карціну,
Двухручную тачку,
І вельмі малога сабачку.

Выдалі пані на станцыі
Чатыры зялёных квітанцыі,
Дзе быў запісаны багаж:
Дыван,
Чамадан,
Сакваяж,
Карціна,
Двухручная тачка,
І вельмі маленькі сабачка.

Рэчы вязуць на пэрон,
Кладуць у апошні вагон.
Пагружаны, урэшце, багаж:
Дыван,
Чамадан,
Сакваяж,
Карціна,
Двухручная тачка,
І вельмі маленькі сабачка.

Як толькі крануўся цягнік,
Сабачка саскочыў і знік.

На станцыі Койданава
Знайшлі, што чагосьці няма.
І лічаць, і лічаць багаж:
Дыван,
Чамадан,
Сакваяж,
Карціна,
Двухручная тачка…
Панове, а дзе ж той сабачка?

Тут бачаць, што ля смеццебака
Стаіць аграмадны сабака.
Злавілі яго – і ў багаж,
Туды, дзе ляжаў сакваяж,
Карціна,
Двухручная тачка,
І там, дзе раней быў сабачка.

Прыехалі ў Менск на вакзал.
Насільшчык з вагону дастаў
Увесь, як належыць, багаж:
Дыван,
Чамадан,
Сакваяж,
Карціну,
Двухручную тачку…
І вось дастае ён сабачку…

Сабака тут як зарычыць!
А пані тут як закрычыць!
— Даўбешкі! Смаўжы! Абібокі!
Сабака занадта высокі!
Яна адпіхнула дыван,
Адкінула прэч чамадан,
Карціну,
Двухручную тачку…
— А ну, аддавайце сабачку!

- Паслухайце, пані! На станцыі
(Вось тут напісана ў квітанцыі)
Ад вас атрымалі багаж:
Дыван,
Чамадан,
Сакваяж,
Карціну,
Двухручную тачку,
І вельмі малога сабачку.

Аднак, пакуль ехалі з Польшчы,
На нашых харчах ён пабольшаў!

Пераклад: Аляксей Шэін

Каментаваць

  

  

  

Магчыма карыстацца гэтымі HTML тэгамі

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>